ՀՀ բարձրագույն ուսումնական հաստատությունների ուսանողների համար «Հայաստանի ազգային պոլիտեխնիկական համալսարան» հիմնադրամի Ուսանողական խորհուրդը, Հանքավանի «Պոլիտեխնիկ» ուսումնամարզաառողջարանական ճամբարում, օգոստոսի 5-10-ը կանցկացնի «Միասնության ուժը» ռազմահայրենասիրական, ուսանողական-երիտասարդական հավաքը։
Հավաքի 6 օրերի շրջանակներում, համաձայն հավաքի կանոնների, երիտասարդները կբաժանվեն 3 ճակատների և հանուն միասնության հաղթանակի միմյանց հետ կմրցեն ավելին քան 15 սպորտային, ինտելեկտուալ և մշակութային մրցութաձևերում։ Կանցկացվեն նաև հանդիպումներ հասարակական, քաղաքական և մշակութային գործիչների հետ։
Այս տարի ճակատները անվանակոչվել են ի պատիվ Հայաստանի հանրապետության ազգային հերոսների, ովքեր իրենց գործունեությունը ծավալել են 3 տարբեր ուղղություններով՝ ռազմական, մշակութային և գիտական:
«Կարմիր Ճակատ»-ը կկրի հայազգի ռազմական գործիչ, ՀՀ զինված ուժերի գեներալ-մայոր, Արցախյան ազատամարտի մասնակից, Հայաստանի պաշտպանության նախկին փոխնախարար, ՀՀ ազգային հերոս, Արցախի հերոս Արկադի Հովհաննեսի Տեր-Թադևոսյանի (Կոմանդոս) անունը։
«Կապույտ ճակատ»-ը կկրի ֆրանսահայ նշանավոր երգիչ, շանսոնիե, երգահան, բանաստեղծ, գրող, կինոդերասան և հասարակական գործիչ ՀՀ ազգային հերոս Վաղինակ Միքայելի Ազնավուրյանի (Շառլ Ազնավուր) անունը:
«Ծիրանագույն ճակատ»-ը կկրի հայ աստղագետ և աստղաֆիզիկոս, Բյուրականի աստղադիտարանի հիմնադիր, ԽՍՀՄ սոցիալիստական աշխատանքի կրկնակի հերոս, ՀՀ ազգային հերոս Վիկտոր Համազասպի Համբարձումյանի անունը:
«Միասնության ուժը» ուսանողական-երիտասարդական հավաքը հզորգաղափարախոսական միջոցառում է, որը նպատակ ունի երիտասարդների մոտ գերակա դարձնել հայրենասիրությունը, միասնությունը ու թիմային պայքարը, ինչպես նաև նպաստելհայրենանվեր գաղափարների սերմանելուն ու զարգացմանը:
Շտապե՜ք գրանցվել և մասնակիցը լինել տարվա ամենասպասված միջոցառմանը։
Դիմում հայտերի ընդունման վերջնաժամկետն է սույն թվականի հուլիսի 15-ը ներառյալ: