Ապրիլի 9֊ին, պոլիտեխնիկցիները իրականացրեցին <<Ճանաչիր Հայաստանը>> խորագրով արշավ, ծանոթանացան Լոռու մարզի հրաշք բնության հետ։
Սկզբում ուսանողները բացահայտեցին Սանահինի վանական համալիրը։
Վերջինիս Սուրբ Աստվածածին եկեղեցին կառուցվել է 10-րդ դարի 30-40-ական թվականներին։
966 թվականին Աշոտ Գ Ողորմած թագավորն ու Խոսրովանուշ թագուհին կառուցել են Սուրբ Ամենափրկիչ եկեղեցին՝ իրենց որդիներ Կյուրիկեի (Գուրգենի) և Սմբատի համար։ Հիմնադիր վանահայրն էր Պոլիկարպոսը, որին հաջորդել է վարդապետ գիտնական Հովհաննեսը։
Մյուս բացահայտումը Հաղպատի վանական համալիրն էր։ Հաղպատի Սուրբ Նշան եկեղեցին 976 թվականին հիմնադրել են Աշոտ Գ Բագրատունի թագավորը և նրա կին Խոսրովանուշը։ Հիմնադիր վանահայրն է եղել Սիմեոնը, որը Տիրանուն երեցի հետ ղեկավարել է եկեղեցին և հիմնել վանքի հոգևոր դպրոցը։
Հաղպատի վանական համալիրում ուսանողները շուրջպար բռնած պարում էին ազգային պարերից` Ծաղկաձորը։
Հաջորդ բացահայտումը Ախթալան էր։
Պղնձավանք, Ախթալա 10-րդ դարում հիմնադրված պարսպապատ վանական համալիր, գտնվում է Հայաստանի Լոռու մարզի Ախթալա քաղաքում՝ Երևանից 185 կմ հյուսիս։ Ախթալայի վանական համալիրը Հայաստանի այն քաղկեդոնական վանքերից է, որի կառուցումը համընկնում է Հայաստանի վերածնության շրջանի հետ։ Ախթալայի վանական հուշարձանախմբում ներդաշնակ միահյուսվել են հայկական, վրացական ու բյուզանդական ճարտարապետության տարրերը։
Ուսանողները բացահայտելով Հայաստանի նշանավոր և պատմական վայրերը, տպավորված և լավ հիշողություններով վերադարձան։